តុលាការចេញដីកាចាប់ខ្លួនអតីតមេបញ្ជាការកងរាជអាវុធហត្ថស្រុកសេសាន និងគូកន!

ភ្នំពេញៈ តុលាការបានចេញដីកាបង្គាប់ឲ្យចាប់ខ្លួនលោក សុខ រិទ្ធី អតីតមេបញ្ជាការកងរាជអាវុធហត្ថស្រុកសេសាន និងលោក ម៉ុង វណ្ណដា មន្ត្រីកងរាជអាវុធហត្ថខេត្តស្ទឹងត្រែង ករណីប្រើអំពើហិង្សាទៅលើបុរសអ្នកលក់​អាហារពេល​យប់បណ្តាល​ពិការភ្នែក​ក្នុងជម្លោះពាក្យសម្ដី។ ដីកាបង្គាប់ឲ្យចាប់ខ្លួននេះ ចេញដោយលោកយ៉ា ណារិន ប្រធានក្រុមប្រឹក្សាជំនុំជម្រះ និងជាប្រធាន​សាលាដំបូងខេត្តស្ទឹងត្រែង កាលពីថ្ងៃទី១៦ ខែកុម្ភៈឆ្នាំ២០២៣។ ដីកាបង្គាប់ឲ្យចាប់ខ្លួនជនជាប់ចោទទាំងពីរនាក់ខាងលើដាក់ក្នុងពន្ធនាគារខេត្តស្ទឹងត្រែងក្នុងម្នាក់ៗរយៈពេល៦ឆ្នាំ។ សូមរម្លឹកថា កាលពីថ្ងៃទី៧ ខែវិច្ឆិកា ឆ្នាំ២០២០ មន្ត្រីអាវុធហត្ថទាំងពីរនាក់ខាងលើបានប្រើអំពើហិង្សា​ទៅលើបុរសអ្នកលក់អាហារពេលយប់ម្នាក់រហូតពិការភ្នែកក្នុងជម្លោះពាក្យសម្ដី។